Аляксей Грахоўскі — намеснік прадстаўніцы па моладзевай палітыцы і студэнцтве
2026-02-04
У Прадстаўніцтве па моладзевай палітыцы і студэнцтве Аб’яднанага Пераходнага Кабінета Беларусі ён будзе ўзначальваць напрамак моладзевых праблем. Кандыдатуру Аляксея Грахоўскага ўзгадніла кіраўніца Кабінета Святлана Ціханоўская, як таго і патрабуе працэдура.
Найперш новы намеснік зоймецца праблемамі мабільнасці моладзі, адукацыі і працаўладкавання.
Прадстаўніца па моладзевай палітыцы і студэнцтве Маргарыта Ворыхава так канкрэтызавала задачы, якія стаяць перад яе намеснікам:«Першая прыярытэтная задача — мабільнасць. Маладыя людзі рухаюцца. Яны наладжваюць кантакты. Яны будуюць сеткі. Больш ніякіх бар’ераў.
Другая прыярытэтная задача — адукацыя. Рэальная адукацыя для нармальнай будучыні. Сапраўдныя магчымасці.
Трэцяя прыярытэтная задача — праца. Рэальны бізнес. Рэальныя кар’еры. Маладыя беларусы павінны мець магчымасць будаваць сабе жыццё, якога яны сапраўды заслугоўваюць».
Паводле Ворыхавай, моладзевыя праблемы – не новыя для Аляксея Грахоўскага. Ён адказваў за ўцягнутасць моладзі ў дэмакратычных палітычных арганізацыях, вырашаў праблемы студэнтаў у замежжы, дасягнуў таго, каб адукацыя ў Еўропе была магчымай для моладзі з Беларусі: «Ён мабілізаваў, арганізоўваў і даводзіў справы да выніку. Да рэальнага выніку, а не да пустых абяцанняў».«Занадта доўга беларускую моладзь ігнаравалі. Адсоўвалі ўбок. Казалі чакаць. Казалі маўчаць. Прымушалі прымаць хлусню рэжыму пра іх будучыню. Больш не. Не пры нас», — заявіла Маргарыта Ворыхава.
Аляксей Грахоўскі нарадзіўся ў Мінску 22 ліпеня 2003 года. Выпускнік Беларускага гуманітарнага ліцэя імя Якуба Коласа. У 2025 годзе скончыў бакалаўрыят ва Універсітэце імя Адама Міцкевіча ў Познані на кірунку міжнародныя зносіны, дыпламатыя. Працягвае там жа адукацыю на магістратуры.
З 2019 — сябра Таварыства беларускай мовы імя Францыска Скарыны. У 2023 сузаснаваў Беларускую моладзевую грамадска-палітычную арганізацыю LICHTAR. Сябра Задзіночання Беларускіх Студэнтаў. Валодае беларускай, польскай, ангельскай, украінскай і расейскай мовамі, вывучае нямецкую.
@CabinetBelarus
