Павел Латушка: «Рэзалюцыя Еўрапарламента будзе вызначаць стаўленне ЕС да беларускага дэмруху і рэжыму Лукашэнкі»
2025-10-22
Еўрапейскія дэпутаты падтрымалі рэзалюцыю «Аб сітуацыі ў Беларусі праз пяць гадоў пасля фальсіфікацыі прэзідэнцкіх выбараў».«Гэта комплексная рэзалюцыя, якая ў многім будзе вызначаць стратэгію Еўрапейскага саюза адносна далейшага стаўлення да беларускага дэмакратычнага руху і рэжыму Лукашэнкі», — пракаментаваў дакумент намеснік кіраўніцы Аб’яднанага Пераходнага Кабінета, кіраўнік НАУ Павел Латушка.
Паводле яго, «высновы, якія вынікаюць з гэтай рэзалюцыі, абсалютна дакладныя і ясныя».
«Еўрапейскі саюз працягвае падтрымліваць дэмакратычныя сілы, грамадзянскую супольнасць Беларусі і будзе прымушаць рэжым Лукашэнкі змяніць сваю палітыку ўнутраных рэпрэсій і знешняй агрэсіі. Нам важна, што прадстаўнікі еўрапейскіх краін не прызнаюць Лукашэнку прэзідэнтам краіны і выступаюць за прыцягненне яго і яго прадстаўнікоў да адказнасці за здзейсненыя злачынствы супраць беларускага народа», — заключыў намеснік кіраўніцы АПК.
«Вельмі важна, што пры падрыхтоўцы праекта рэзалюцыі мы ўзаемадзейнічалі з дэпутатамі дэлегацыі Еўрапарламента па сувязях з Беларуссю, ініцыявалі некалькі важных дапаўненняў, шмат з якіх ўвайшлі ў фінальную версію рэзалюцыі, прынятую сёння», — падкрэсліў палітык.
@CabinetBelarus
