Кіраўніца Аб'яднанага Пераходнага Кабінета і яе намеснік правялі перамовы з кіраўніцай парламента Францыі
2025-10-07
У сустрэчы з прэзідэнткай Нацыянальнай Асамблеі Францыі Яэль Браўн-Піве беларускага боку ўдзельнічалі кіраўніца Аб'яднанага Пераходнага Кабінета Святлана Ціханоўская, намеснік кіраўніцы АПК, кіраўнік НАУ Павел Латушка, дарадцы Ціханоўскай Дзяніс Кучынскі і Анатоль Лябедзька і былы палітзняволены, блогер Сяргей Ціханоўскі.
Павел Латушка пад час сустрэчы адзначыў, што Францыя з'яўляецца лідарам у пытаннях захавання правоў чалавека, правасуддзя і дэмакратыі і звярнуўся з просьбай да кіраўніцы французскага парламента пра падтрымку разгляду беларускай сітуацыі ў Міжнародным крымінальным судзе.
Беларускі палітык заявіў пра важнасць прыцягнення прадстаўнікоў рэжыму Лукашэнкі да адказнасці за злачынствы супраць чалавечнасці ў дачыненні да беларускага народа.
Таксама ў кантэксце юрыдычна створанага ў рамках Савета Еўропы Спецыяльнага трыбунала па злачынстве агрэсіі супраць Украіны, Латушка звярнуўся да Яэль Браўн-Піве з просьбай пра падтрымку прыцягнення да адказнасці Лукашэнкі і т. зв. вышэйшага ваенна-палітычнага кіраўніцтва Беларусі за акт агрэсіі супраць Украіны.
Гэтае пытанне таксама абмяркоўвалася на сустрэчы з прадстаўнікамі Палітычнага і прававога дэпартамента МЗС Францыі і з кіраўніком парламенцкай групы «За дэмакратычную Беларусь» Нацыянальнага сходу Францыі Фрэдэрыкам Пеці. Французскі бок выказаў гатоўнасць дэталёва прапрацаваць і разгледзець тэму.
@CabinetBelarus
